Хүмүүн бидний амьдралын туйлын зорилго бол аз жаргалыг эрж хайж, олох байдаг гэдэгтээ

олон хүн санал нийлнэ гэж итгэлтэй байна.Юуг аз жаргал гэх вэ гэдэг нь өөрөө харьцангуй

ойлголт ч гэлээ бид зарим нэг дадал зуршил хандлагаа өөрчилснөөр өөрсдийн хүссэн

аз жаргалаа олж чадна гэдгийг дараах 5 зөвөлгөө танд  батлан  харуулна.

Нэгдүгээр хэсэг – Өөрийгөө хайрлах

Өөрийгөө байгаагаар нь хүлээж авч сур, учир нь чи дахин давтагдашгүй гайхалтайгаар бүтээгдсэн.

Бусадтай өөрийгөө харьцуулж хүний амьдралаар амьдрах хэрэггүй юм.  

Өөрөө өөртөө сэтгэл хангалуун бай. Өөртөө итгэлтэй хүн аз жаргалыг илүү мэдэрч, амьдралын аливаа асуудал бэрхшээлийг дайрч гарах хүч тэнхээ суусан байдаг.

Өөрийгөө хүндэлж яв. Ер нь өөрийгөө хайрлана гэдэг нь өөрийгөө анхаарч халамжлана гэсэн үг юм. Хүн бүр адилхан, бүгд л ямар нэг алдаа дутагдалтай, тэглээ гээд санаагаар унаж, өөрийгөө голж явах нь өөрийн гараар өөрийгөө хорлож байгаатай адил.

Чи өөрийгөө хүндэлж эхлэхэд бусад хүн чамайг дагаад хүндэлнэ. Ийм уур амьсгал мэдрэх хичнээн сайхан гээч.

Өөрлөлтийг өөрөөсөө эхэл. Хэн нэгнийг өөрчлөх гэж зүтгэх нь хаданд ойх цуурайтай адил хоосон зүйл юм.

Иймд өөрийгөө л өөрчлөхөөс илүү бодитой зүйл байхгүй. Бусдыг өөрчлөх гэж цагаа барахын оронд бусдад тохируулж өөрийгөө өөрчлөх нь илүү бодитой, боломжтой зүйл юм.

Хэрэггүй хүмүүсээс өөрийгөө чөлөөлж сур. Нийгмийн харилцаагүйгээр хүмүүн бид амьдрана гэдэг бараг л боломжгүй зүйл юм тэхээр амьдралын хаа нэгтээ ямар нэг сөрөг хүмүүстэй таарч байдаг.

Сөрөг энергитэй хүмүүсээс өөрийгөө хол байлгаж сурах хэрэгтэй.  

Тэднээс болж та тааламжгүй байдалд орж, шаналж, зовох хэрэггүй, зүгээр л тоохгүй байж сурах хэрэгтэй.

Өөрийгөө урамшуулж байх хэрэгтэй. Дэлгүүр хэсэх, сайхан ресторанд хооллох, аялах зугаалах, найзуудтайгаа уулзах, дуулж, бүжиглэх гээд юу ч хийж өөрийгөө урамшуулж шагнаж болно. Та өөрийнхөө дуртай зүйлээ хийж дадах нь аз жаргалын нэг чухал хэсэг юм шүү.

Хоёрдугаар хэсэг – Бусдыг хайрлах

Бусдыг хүндэлж байх. Танд бусад хүн яаж хандаж, харьцаасай гэж хүсдэг яг тэр харилцаагаа та бусдад үзүүлснээр тэднээс ирэх хандлага сайхан байдаг гэдгийг санаж байх хэрэгтэй юм.

Хүмүүс бид чинь нийгмийн амьтан тул муухай зан гаргаж ганцаардмал байхын оронд бусдыг хүндэлж байх нь аз жаргалтай амьдрах нэг үндэс юм.

Бусдад өгч сурах. Гэр бүлийн, найз нөхдийн, хайр сэтгэлийн гээд ямар ч харилцаанд ялгаагүй та тэднээс хүсдгээсээ илүүг тэдэнд өгч чаддаг байвал таны амьдрал илүү сайхан болно. Хувиа хичээсэн зан хэнд ч хэрэггүй юм.

Гэхдээ өгөөд ч нэмэргүй хүмүүс байдгийг санаж, юмыг 2 талаас нь хүлээж авч сураарай.

Яг л “сайн хүнд муу юм бүү хий мартддаггүй юм” харин “муу хүнд сайн юм битгий хий мэддэггүй юм” гэдэг зүйрлэлтэй адил юм.

Бусдад туслах. Бидний амьдралыг аз жаргалаар дүүргэдэг нэг зүйл бол бусдад туслах байдаг. Хэрэв та өөрийгөө илүү аз жаргалтай болгъё гэж боддог бол бусдад тусла. Тоолошгүй олон зүйлийн тус байдгийг санаарай.

Эерэг байж сурах. Хоосон атаархал хүнд юу ч өгөхгүй харин тэрний оронд сайн яваа нэгнийгээ дэмжиж, сайн талыг нь даган дууриаж тэднээс суралцаж өөрийгөө хөгжүүлж байх нь л танд хэрэгтэй.

Бусдын алдаа хүлээн зөвшөөрөх. Хүн бүр өөр байдаг ч бүгд л адилхан алдаа гаргадаг.

Бусдын гаргасан алдаан дээр анхаарлаа хандуулж уурлаж бухимдахын оронд тэдний хийсэн алдааг өөр өнцгөөс нь харж сурах хэрэгтэй.

Найз нөхөдтэй байх. Тэдэнтэйгээ байнга холбоо харилцаатай байх.

Найзуудтайгаа ойр байдаг хүмүүс уйтгарлах, шаналах, сэтгэлээр унах зэргийг бусад хүмүүстэй харьцуулахад хамаагүй бага мэдэрдэг.

Гуравдугаар хэсэг – Өөрийнхөө байгаа байдалд сэтгэл хангалуун байх

Өөрийгөө ол. Юуны түрүүнд та хамгийн дуртай зүйлээ олох хэрэгтэй, ямар ажил хийвэл таныг аз жаргалтай болгодог гэдгийг мэддэг байх хэрэгтэй, зарим хүмүүс юунд дуртайгаа ч мэдэхгүй амьдардаг.

Ямар нэг дуртай зүйлээ олж түүнийхээ төлөө амьдарвал таны амьдрал илүү утга учиртай болно.

Өөрийн хийх дуртай ажлаа олж, хүрэхийг хүссэн амжилтынхаа төлөө тууштай яв.

Ингэж та зорилготой амьдарч эхлэх үед өглөө бүр баяр баясгалантай сэрж, орой бүр сэтгэл хангалуунаар өдрөө өнгөрөөх болно.

Зорилгоо тодорхойлж, түүнийхээ төлөө тууштай явж байгаа хүн ямар ч саад бэрхшээлд бууж өгдөггүй.

Дөрөвдүгээр хэсэг – Өөрийгөө нээж таниулах

Үргэлж суралц. Юу сурмаар байна, ямар чадвартай болмоор байна түүнийгээ олохын төлөө хичээл зүтгэл гарга. Энд нас ямар ч хамаагүй гэдгийг санах хэрэгтэй.

Байгальтай ойр байх. Гадаа гар, явган яв, байгальд амар. Бид хотод шигдэж, хэдэн байшингийн дунд амьдарсаар баригдмал сэтгэлгээтэй болж, байгалийн сайхныг мэдрэхээ больчихдог.

Тогтмол дасгал хий. Хүн ер нь заавал турах гэж, булчин суух гэж, сайхан биетэй болох гэж дасгал хийдэггүй.

Эрүүл, урт наслахад дасгал, хөдөлгөөн маш чухал.

Эрүүл сайхан амьдрах дадал зуршил өөртөө суулгах дасгал хөдөлгөөн байнга хий.

Аялалд явах. Аялал хүнд шинэ туршлага суулгаж, нүдийг нь нээж, чухал боловсрол олгодог.

Амьдралыг илүү өнгөлөг, аз жаргалтай болгоно.

Эрсдэлтэй нүүр тул. Ямар ч эрсдэл гаргахгүйгээр, өөрийн тухлаг бүсдээ амьдрах нь таныг нэг хэвийн, хөгжил дэвшилгүй амьдрал руу хөтөлнө.

Та хүссэн мөрөөдөл, зорилгоо биелүүлж, аз жаргалтай амьдрахын тулд ямар нэг хэмжээгээр заавал эрсдэл гаргах шаардлага гардаг.

Бэлэн хоол зөвхөн хулганы хавханд байдгийг анхаарах хэрэгтэй.  

Тавдугаар хэсэг – Баяр баясгалангаа хөхүүлэн тэтгэж, уйтгар гунигийг таягдан хаях

Өөрийн амьдралдаа идэвхи санаачлагтай байж, гарч ирэх боломжийг цаг алдалгүй ашиглаж, өөрийн амьдралдаа эзэн болж амьдар.

Эргэлзэж тээнэгэлсэн цаг мөч бүр урсан одох голын урсгал мэт таны хажуугаар өнгөрөөд л гарна.

Өөрчлөлтийг хүлээж авч сур. Та хүссэн хүсээгүй ямар нэг өөрчлөлттэй байнгын нүүр тулж байдаг. Хувьсан өөрчлөгдөх зүйлтэй тэмцэж цагаа дэмий үрснээс өөрчлөгдөж байгаа зүйлдээ зохицож сурснаар та санаа зовох зүйлгүй сэтгэл хангалуун амьдрах болно.

Хариуцлагатай байх.

Өөрийгөө аз жаргалгүй байна гэж боддог хүмүүсийн ихэнхи нь бусдаас бурууг хайгаад сурчихсан байдаг. Өөртөө хариуцлага үүрч сурсан хүмүүс илүү аз жаргалтай байдаг юм.

Талархаж сурах.

Амьдралд тохиолдсон сайн сайхан зүйлийг хүлээж авч талархаж байхын оронд ирээдүйд санаа зовж, илүү ихийг шаардаж өөрийгөө шаналгадаг хүмүүс байдаг бол одооноос эхлэн байгаа зүйлдээ сэтгэл ханаж, байгаа бүхэндээ талархаж амьдрах нь сайхан амьдралын нэг үндэс болдог гэдгийг санах хэрэгтэй.

Битгий бууж өг.

Ямар нэг саад бэрхшээл бол түр зуурын гэдгийг санаж бууж өгөлгүйгээр даван туулж сурах хэрэгтэй. Энэ дэлхийд бүх зүйл л түр зуурынх байдаг.

Баясаж зугаацахаас бүү хойш суу. Бид нас нэмэх тусам намба сууна гэж ярьдаг нь үнэн хэрэгтээ бол сэтгэлийн хөдлөлөө дарж эхэлдэг.

Хүмүүс юу гэх нь хамаагүй та хүссэнээрээ байж, хүмүүсийн бодлоор өөрийгөө хязгаарлалгүй чөлөөтэй, өөрийнхөөрөө байх үед та аз жаргалыг мэдэрч эхэлнэ.